Ilontsera : « Fizarana toro hay »

Serge Henri Rodin, tompon’andraikitra ao amin’ny Laboratoire de recherche en management et médiation culturelle (LABMED), mpampianatra-mpikaroka ao amin’ny Departemantan’ny Fianarana Teny sy Kolontsaina Frantsay sy Francophone, mpanao gazety taloha sady mpanakanto, dia mizara fijery lalina momba ny anjara toerana sy ny andraikitry ny asa fanaovan-gazety amin’ny fiaraha-monina ankehitriny. Araka ny fanamarihany, “Ny asa fanaovan-gazety dia mitondra kolontsaina ho an’ireo izay mijery, mamaky na mihaino vaovao.” Izany indrindra no mahatonga ny mpanao gazety tsy maintsy hitandrina fatratra amin’ny famoaham-baovao, indrindra amin’ny alalan’ireo fitaovana maoderina entina miserasera, izay tena manan-kery amin’ny fanapariahana sy fanovàna toe-tsaina.

Ao anatin’ny LABMED (Sehatra ikarohana momba ny hetsika everina fa mikolo saina), izay ao amin’ny Oniversiten’Antananarivo, Fakiolten’ny Teny aman-Tsoratra sy ny Siansa maha Olona, dia atao laharam-pahamehana ny fikarohana mifototra amin’ny kolontsaina sy ny fifandraisana. Ao anatin’izany hodidin’ny fandalinana izany indrindra no anambaran’i Serge Henri Rodin ny heviny momba ny Ilontsera sy ny anjara andraikiny eo amin’ny sehatry ny asa fanaovan-gazety sy ny serasera amin’ny ankapobeny. Manasongadina izy fa ilaina ny fandraisana andraikitra iraisan’ny sehatra rehetra, na ara-tsiantifika, na ara-kolontsaina, na ara-tsosialy, mba hahafahana manamafy sy mampivelatra ny tontolon’ny fampahalalam-baovao ho an’ny fampandrosoana maharitra.

Lalaina RAKOTONIRINA